تشرب شاى ؟
من مأثورات حسام هيكل
انا عملت شاى و نسكافيه كتير
تشرب معايا ؟
ملتفت لا يصل
التخطيط لغد افضل و حياة ممتعة
كن كما تحب و افعل ما تحب لن يحنوا عليك احد و لن يرحمك احد انت سيد حياتك
لا احد يهتم بما تفعله في حياتك
في كل الاحوال سيتحدث الناس
يبحث الناس عن النقيصة فيك ليشعر انه افضل منك
اكسر التابوهات داخلك و لا تكترث لنظرة الناس ولا لحديثهم
استمر في كسر الحواجز حتي تصير الحواجز كما العدم
آمن بحلمك طريقك طويل
حاول هتوصل مفيش مستحيل 🙅
استمر استمر دون ضعف و سيكون التوفيق حليفك
تجاهل الاغبياء و اقترب من المؤثرين
لا داع للخجل لا أحد مهتم
هايل جروب
بدأت هايل من خلال موقع على الانترنت فى يوليو 2001
هايل مشروع طموح اعتقد اليوم انه للأسف جزء من تاريخ الانترنت
راح زى ما راح مشروعات ويب كتير
مكتبنا مفتوح فى بورسعيد من اكتوبر 2007 حتى ديسمبر 2015
و بتاريخ اليوم اكتوبر 2019 هايل جروب موجوده فقط فى القلب يمكن ترجع تانى قريب
كامننا
الاختيارات المحدودة فى مجتمع الفقر و الجهل و المرض
في عمر ست سنوات صدمتني مدرستي الابتدائية مكنتش عايز اروح المدرسة مبحبش التعليم و اجبرت علي اختيار مدرسة تلو الاخري في اول ظهور حقيقي لوجه الدنيا
و فى عمر عشرة سنوات راحت امي و ربما لم اشعر بالحزن بسبب غلظة ربما عن جهل او دون قصد اللي كنت حاسس بيها من ناحيتها كنت الاخير في ترتيب اخوتي و جيت في وقت ضايع و مرض دائم و الحمل التقيل اللى حست بيه امي من ساعة ما عرفت بالحمل حاولت ان تتخلص مني و مكنتش عاوزه تخلينى اشوف الدنيا ربما لعلمها بحاجة معينة مستنيانى وربما لأن العمر لم يعد يحتمل تربية العياال
انتصار إرادة ربنا وكان اللى كان وطفلك بين ايديك دون ارادتك و ربما سببا في تدهو حالتك الصحية حتي الوفاه
الموضوع مكنش شاغلنى بأى حال فأختي صفية تكفلت بتربيتى مع الاسف طقلة بتربى طفل و ابي يدللني بالقدر الذي يتاح له في العسر و حين اليسر
يدعي ابي علية رحمة الله اننا ميسوري الحال و أدعي ان سقف طموح ابي هو غرفة فوق الأرض بها كرويته و تلاجه فيها خيرات ربنا
لم يكن للمستقبل اي معالم واضحة سوي التي يتم اتاحته امامي من إختيارات لها طعم الجبر مرة بأن ده الممكن و ده الافضل و ده المتاح و مرة يتقالى إختار يا حبيبي بين الممكن و المتاح
نفسك ف ايه كامننا
في نفس التوقيت الي كان هنيدي نفسه في كامننا انا مكنش نفسي ف حاجة طموح لا يتعدي التخرج من الابرنتيه – معهد فنى صناعى – و التدرج في الوظيفة الثابتة ميكانيكى ديزل قد الدنيا شغلانه ذات دخل مضمون وكما هي سمة اختيارات تلك المرحلة لم تكن لي ارادة فيها او طموح في تجاوزها
تأشيرة شنجن من سفارة فرنسا بالقاهرة مع الأسرة
انا قدمت اوراق التأشيرة و عملت كل الحجوزات بنفسي و حابب اشارك التجربة معاكم
الدخول على الموقع و ملئ الابلكيشن و طباعته للمجموعة
بعد ما بتخلص ابلكيشن رب الأسرة بتكمل إضافة باقي الأسرة
تطبع الابلكيشن و الاوراق المطلوبة
عمل حجز طيران من اى مكتب سياحة ، انا حجزت حجز فعلي بس قابل للالغاء و حجز الاوتيل من بوكينج غير مدفوع
التأمين طبى من اى مكتب سياحة و فيه تأمين طبي للأسرة كاملة ممكن تستفيدوا بخصم
ترجمة الاوراق من اى مكتب معتمد في مصر مفيش مكتب ترجمة معين أو معتمد من السفارة
بعد تجهيز الأوراق حجز موعد على tls
قدمت الاوراق في المكتب و ممنوع الاطفال اقل من 12 سنة يحضروا بنفسهم ممنوع
عندى طفلة 6 سنوات ف kg2 بالتالي متوقعتش ان هيكون مطلوب ليها شهادة انها مسجلة في مدرسة أو حضانة لكن للاسف كان مطلوب وانا طلبت انى اقدم من غيره معتقدا انها حاجة بديهية دى طفلة مدخلتش مدرسة
اخدوا بصمات اليد و صورة في المكتب
قدمت الخميس يوم الاحد الورق وصل للسفارة يوم الاتنين وصلنى تعليمات من السفارة مطلوب
شهادة تسجيل الطفلة الدراسية
حساب بنك اللى بينزل عليه المرتب لانى كنت مقدم حسابات ملهاش علاقة بالمرتب
كلمنى حد من مكتب tls و سألته المفروض اقدم الاوراق الناقصة خلال كام يوم قاللي خمس ايام عمل و لما بعتلهم ايميل استفسر عن المدة قالولى في اقرب وقت و القنصلية محددتش مدة
المهم جهزت الأوراق خلال 5 ايام و روحت يوم الاحد قدمت الورق سلمته في الدور الخامس اللى بنستلم منه الباسبور
يوم الاتنين القنصلية اتصلت بيا و سألتنى موظفة عن المدة
انا مسافر أوروبا 12 يوم و تركيا 18 يوم و مقدم كل مسار الرحلة
الموظفة سألتنى هتاخد إجازة لمدة شهر ازاى ؟
وضحتلها انى عندى رصيد كاف
و المدام هتقدر تسيب شغلها لمدة شهر ازاى ؟
لان عندها بزنس خاص قولتلها هتوكل حد في الإدارة و هتتابع بالايميل
يوم الثلاثاء لقيت الخطوة بتاعت السفارة بقي لونها اخضر و الأربعاء استلمت الباسبور و التأشيرة
الصور الشخصيه اللى طلبوها مستخدموهاش في التأشيرة استخدموا الصور اللى صوروهالنا مع البصمة
بالنسبة للطفلة استخدموا الصورة اللى في الابلكيشن عادى
لو عندكم اى استفسار تحت امركم
مساء الخير
الهدف من المدونة دى تسجيل مواقف عدت عليا فى حياتى و توثيقها
مع تجربة تقارب ال 20 عاماً فى مجال الويب و محاولات كتير منها الناجح و كتير منها فاشل كنت شاهد على تحولات ظهور و انتشار الانترنت فى مصر و الوطن العربى ساهمت فى تنمية المحتوى العربى على الانترنت هحاول احكى عن تجارب ممكن تكون مفيدة
لو عجبك كلامى كتر خيرك لو معجبكش سامحنى ضيعت وقتك حاول تتابعنى بعدين يمكن اكون اتحسنت و عملت حاجة تعجبك
تحياتى
هايل 🙂